Press-reliZ 11 iyun 2010-cu IL Bakı, Azərbaycan




Yüklə 18.95 Kb.
tarix20.04.2016
ölçüsü18.95 Kb.
R A T İ

Reportyorların Azadlıq və Təhlükəsizlik İnstitutu


PRESS-RELİZ
11 iyun 2010-cu il

Bakı, Azərbaycan


  • AVROPA MƏHKƏMƏSİNİN EYNULLA FƏTULLAYEVLƏ BAĞLI QƏRARI İCRA OLUNMALIDIR

  • İCRA BAŞÇISI XÜSUSİ İTTİHAM QAYDASINDA MƏHKƏMƏYƏ MÜRACİƏT EDİB



AVROPA MƏHKƏMƏSİNİN EYNULLA FƏTULLAYEVLƏ BAĞLI QƏRARI İCRA OLUNMALIDIR
“Avropa Məhkəməsinin qərarı üzv ölkələr üçün məcburidir”. Bu barədə “Turan” informasiya agentliyinə Avropa Şurasının eksperti, hüquqşünas Piotr Turek Avropa İnsan Haqları Məhkəməsinin “Gündəlik Azərbaycan” və “Realnıy Azerbaydjan” qəzetlərinin həbsdə olan baş redaktoru Eynulla Fətullayevlə bağlı çıxardığı qərara münasibət bildirərkən açıqlayıb.

Avropa İnsan Haqları Məhkəməsinin qərarlarının yerinə yetirilməsinə Avropa Şurası Nazirlər Komitəsinin nəzarət etdiyini deyən Turek əlavə edib ki, əgər Azərbaycan hökuməti jurnalistlə bağlı qərarı yerinə yetirməzsə, Nazirlər Komitəsinə dəvət edilərək, qərarın icra olunması ilə əlaqədar qərar qəbul edilə bilər.

Avropa Şurası baş katibinin Azərbaycandakı xüsusi nümayəndəsi Veronika Kotek də Avropa Məhkəməsinin Eynulla Fətullayevlə bağlı qərarının həyata keçirilməsi barədə sualları cavablandırarkən bildirib ki, Avropa Məhkəməsinin qərarı verildiyi tarixdən 3 ay sonra qüvvəyə minir. Həmin müddət ərzində tərəflərin işi Məhkəmənin Böyük Palatasının müzakirəsinə çıxarmaq hüququna malik olduğunu deyən Veronika Kotek, qərar qüvvəyə mindikdən sonra isə onun icrası məsələsinin gündəliyə çıxarılacağını qeyd edib. Bu barədə APA informasiya agentliyi məlumat yayıb.

Qeyd edək ki, İnsan Hüquqları üzrə Avropa Məhkəməsi “Gündəlik Azərbaycan” və “Realnıy Azerbaydjan” qəzetlərinin həbsdə olan baş redaktoru Eynulla Fətullayevin işi  üzrə qərar verib. Aprelin 22-də açıqlanan qərarda bildirilir ki, jurnalist dərhal azadlığa buraxılmalı və Azərbaycan dövləti ona 27 min 822  avro məbləğində təzminat ödəməlidir.

Xatırladaq ki, E.Fətullayev 2007-ci il aprelin 20-də Qaçqın və Məcburi Köçkünlərin Hüquqlarını Müdafiə Birliyinin sədri Tatyana Çaladzenin iddiasına əsasən Yasamal Rayon Məhkəməsinin qərarı ilə məhkəmə zalında həbs edilib.Həbs edildikdən bir ay sonra “Realnıy Azerbaydjan” qəzetində  dərc olunan və Azərbaycanda işləyən xarici ölkə vətəndaşları  və beynəlxalq qurumlarda təşviş yaratdığı iddia olunan yazı ilə əlaqədar Milli Təhlükəsizlik Nazirliyinin Baş İstintaq İdarəsində E.Fətullayevlə bağlı cinayət işi başlanıb. Cinayət Məcəlləsinin 214.1-ci (terrorçuluqla hədələmə) və 283.2.2-ci (qulluq mövqeyindən istifadə etməklə milli, irqi, sosial və ya dini nifrət və düşmənçiliyin salınması) maddələri ilə ittiham irəli sürülüb və məhkəmə yoluyla onun barəsində həbs-qətimkan tədbiri seçilib. Sonradan istintaq E.Fətullayevi külli miqdarda vergidən yayınmada (213.2.2-ci maddə) da ittiham edib.

2007-ci il oktyabrın 30-da Ağır Cinayətlərə Dair İşlər üzrə  Məhkəmənin qərarı ilə E.Fətullayev 8 il 6 ay müddətinə  azadlıqdan məhrum edilib və ona 242 min 522 manat həcmində cərimə kəsilib.

29 dekabr 2009-cu ildə isə 12 saylı Cəzaçəkmə  Müəssisəsində Fətullayevin üzərindən 0,223 qram heroin tapılıb. Bununla əlaqədar olaraq Qaradağ Rayon Polis İdarəsinin İstintaq Şöbəsində E. Fətullayev barəsində Cinayət Məcəlləsinin 234.1 (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddəsi ilə açılmış cinayət işi üzrə istintaq yekunlaşıb və bu işə Qaradağ rayon məhkəməsində baxılır. Eynulla Fətullayev, vəkili, həmçinin bir çox yerli və beynəlxalq təşkilatlar bu işi  yaxın zamanlarda jurnalistin həbsi ilə  bağlı Avropa İnsan Haqları Məhkəməsinin  qərarının  qarşısını almaq məqsədilə əvvəlcədən qurulmuş əməliyyat kimi qiymətləndirir.

Qeyd edək ki, 2005-ci ildən  Eynulla Fətullayevin təsisçiliyi və baş redaktorluğu ilə “Realnıy Azerbaydjan” qəzeti həftəlik, “Gündəlik Azərbaycan” qəzeti isə gündəlik nəşr olunub. 2007-ci ildə baş redaktorun həbsindən sonra hər iki qəzet fəaliyyətini dayandırıb.


İCRA BAŞÇISI XÜSUSİ İTTİHAM QAYDASINDA MƏHKƏMƏYƏ MÜRACİƏT EDİB
Bu gün (11 iyun) Yasamal rayon məhkəməsində hakim Xəqani Məmmədovun sədrliyi ilə Yasamal rayon icra hakimiyyətinin başçısı İbrahim Mehdiyevin vətəndaş Yaqub Muradzadəyə qarşı xüsusi ittiham qaydasında qaldırdığı iddia üzrə hazırlıq iclası keçirilib. Hazırlıq iclasında iddiaçının nümayəndələri Zahir Niftəliyev və Azər Tağıyev, cavabdeh Yaqub Muradzadə və onun nümayəndələri Əlibaba Rzayev və Şəhriyar Əliyev iştirak edirdilər.

Əlibaba Rzayev Yasamal rayon icra hakimiyyətinin məhkəməyə təsir imkanlarının olmasını əsas gətirərək, iddiaya başqa məhkəmədə baxılması barədə etiraz təqdim edib. İddiaçının nümayəndələri isə etirazın əsassız olduğunu bildirərək, təmin edilməməsini xahiş ediblər.

Hakim etirazın məhkəmənin sədrinə təqdim ediləcəyini bildirərək, sədrin qərarına qədər hazırlıq iclasının təxirə salındığını bildirdi.

Qeyd edək ki, Yaqub Muradzadə 2004-2006-ci ildə nəşr olunan və hazırda fəaliyyət göstərməyən “Yeni Qəzet”in redaktoru olduğunu bildirir.

Xatırladaq ki, İ.Mehdiyev Yaqub Muradzadənin onun barəsində müxtəlif dövlət qurumlarına yazdığı şikayət məktublarında təhqir və böhtana məruz qaldığını hesab edərək, Cinayət Məcəlləsinin 147 (böhtan) və 148-ci (təhqir) maddələri ilə xüsusi ittiham qaydasında məhkəməyə verib.

 


MƏLUMATLARIMIZDAN İSTİFADƏ EDƏRKƏN RATİ-YƏ İSTİNAD EDİN

 

Reportyorların Azadlıq və Təhlükəsizlik İnstitutu (RATİ)



Ünvan: Azərbaycan, Bakı şəh., Behbudov 8, mənzil 85/86

tel: (+99 412) 418-03-34, fax: (+ 99 412) 598-45-19

24 saat ərzində aktiv olan qaynar xətt: (+ 994 055) 816 40 04

e-mail: irfs.az@gmail.com

web: www.irfs.az  skype: irfs.az


Verilənlər bazası müəlliflik hüququ ilə müdafiə olunur ©azrefs.org 2016
rəhbərliyinə müraciət

    Ana səhifə