BİNNƏt eloğlu elin dəRDİ, HƏSRƏTİ (şeirlər və poemalar)




Yüklə 2.06 Mb.
səhifə11/20
tarix22.02.2016
ölçüsü2.06 Mb.
1   ...   7   8   9   10   11   12   13   14   ...   20

13.06.1965
Ağ atlı oğlan
Üzüm haqda qalıb, gözüm yollarda,

Harada qalıbsan, ağ atlı oğlan?

Yoxsa səni udub naqqa balığı,

Dəryada qalıbsan, ağ atlı oğlan?

Səni gözləməkdən səbrim tükəndi,

Yağılar taladı şəhəri, kəndi.

Yoxsa düşmən kəsib bərəni, bəndi,

Sən darda qalmısan, ağ atlı oğlan?

Yağı pərən-pərən saldı ordunu,

Xainlər dar gündə atdı yurdunu.

Xanbala, Bəybala satdı yurdunu,

Səhrada qalıbsan,ağ atlı oğlan.

Həsrətin atanın qəddini əyib,

Deyirlər, dalınca kömək gəlməyib.

Şuşada son güllən özünə dəyib,

Orada qalıbsan, ağ atlı oğlan.

Gəlir ziyarətnə el dəstə-dəstə,

Solmaz güllər düzür məzarın üstə.

«Gəl qisas al!» deyir bir boyu bəstə,

Harada qalıbsan,ağ atlı oğlan?



19.12.1992

Necə əl çəkim?
A xallı daz, kürən, qoy bilsin hamı,

Aldın yorğanımı, cırdın çuxamı.

Sinəmə dağ çəkdin, açdın yaxamı,

Mən sənin yaxandan necə əl çəkim?!

Gözüm görə-görə min tələ qurdun,

Qanıma susayıb zəlitək sordun.

Üzümə irişib, arxadan vurdun,

Mənə kəc baxandan necə əl çəkim?!

Mən səndən görmədim xoş bir baxış da,

Başıma uçurdun komamı qışda.

Qapılara saldın qarda, yağışda,

Evimi yıxandan necə əl çəkim?!

Azad yaşamadım bircə anımı,

Azadlıq istədim, tökdün qanımı.

Binnətəm, yanvarda mənim canımı,

Odlara yaxandan necə əl çəkim?!



09.02.1990

Dillərə düşə
Nə ola çəmənə çıxasan, ey gül!

Ətrin çiçəklərə, güllərə düşə.

Mənim də farağat durmaya əlim,

Yazdığım əllərdən-əllərə düşə.

Ay məni odlara yandırıb-yaxan,

Sənə vurulduğumu başıma qaxan,

Sənə rast olanda açıla yaxan,

Dərdindən Məcnuntək çöllərə düşə.

Hardasan, pozubdur qəm əhvalımı?

Məktubla da soruşmursan halımı.

Bizim aramızı vuran zalımı

Dərdlərə, odlara, sellərə düşə.

Həsrətindən az qalır ki, ağlayam.

Sən gedəli mən sinəsi dağlıyam.

Məcburam şəninə dastan bağlıyam,

Aşıqlar oxuya, dillərə düşə.

İnsaf et, bir görün, qalmışam həsrət,

Ahım səni tutar, eylə mərhəmət.

Elə eyləmə ki, biçarə Binnət

Saz alıb aşıqtək ellərə düşə.



28.03.1960

Görünmür
Elin dərdləri çox, çarə edən yox,

Hələ ki, bir işıq ucu görünmür.

Yol var körpüsü var, gələn - gedən yox,

Yollar ağı deyir, yolçu görünmür.

Itə, qurda qaldı elin dağları,

Talandı bağçası, yandı bağları.

Pozuldu bostanı, yandı tağları,

Nə bağban, nə də ki, suçu görünmür.

Əlləri qoynunda Binnət qan ağlar,

Həsrətdən sızlayır ağlar bulaqlar.

Büküb məlul-məlul boynunu dağlar,

Ellərin yaylağa köçü görünmür.



16.05.1992
Nə mən, nə sən
Hicran atəşinə pərvanə kimi,

Nə mən alışmayım, nə sən alışma.

Mətləbə, murada yetməyənlərlə

Nə mən yarışmayım, nə sən yarışma.

Kimdəsə xoş qılıq, xoş üz görməsək,

Onunla dostluğu, ülfəti kəsək.

Bizdən küsənlərdən gəl biz də küsək,

Nə mən barışmayım, nə sən barışma.

Binnətəm, canına canım sadağa,

Artıq söz-söhbətə qoyaq qadağa.

Gəl duraq üz-üzə, dodaq-dodağa,

Nə mən danışmayım, nə sən danışma.



15.04.1980
Fələk
Arvad hesabına ucalan nadan,

Sənə əllərilə taxt qurur fələk.

Namərdlik eləyir mənə hər zaman,

Səninsə arxanda mərd durur fələk.

Tərs çərxin tərs olar gördüyü tədbir,

Pisə nəşə verər, yaxşıya cəbr.

Sənə şeş atdırır, mənə iki-bir,

Tərəfkeşlik edib uddurur fələk.

Mənə itirtdirir, sənə tapdırır,

Zorunu artırıb çalıb-çaldırır.

Sənə dəbdəbəli saray yapdırır,

Mənim çardağıma od vurur fələk.

Sənə qalxmaq üçün nərdivan qurur,

Məni yıxmaq üçün badalaq vurur.

Gah da şərə salıb üzümə durur,

Insafı unudub bəduğur fələk.


Uyma ilqarına bu gəlhagəlin,

Əl tut başqasına, tutursa əlin.

Bir gün puç olacaq, bu gəlhagəlin,

Bəzən qurduğunu uçurur fələk.

Əlindən gəlməyir fərli bir peşə,

Pul ilə oynayır əlin həmişə.

Binnətin düz sözü keçməyir işə,

Sənin yalanını doğurur fələk.



14.11.1987
Ahımdır mənim
Aləmə ün salan ney, kaman deyil,

Sinəmdən ucalan ahımdır mənim.

Vaxtsız solan çəmən, gülüstan deyil,

Xəzan vurmuş bağçam, bağımdır mənim.

Şəhidlər yasıdır saxladığım yas,

Qisas qiyamətə, qan yərdə qalmaz

Dərdimin dəvası qisasdır, qisas!

Yağıdan öc almaq çağımdır mənim!

Əlimdən gedibdir Şuşam, Ağdamım,

Sönüb Xocalıda ocağım, şamım.

Qələbə çalmaqdır murazım, kamım,

Məğlubiyyət sinə dağımdır mənim.

Yurdsuz qalıb didərginim, qaçqınım,

Dağılıbdır Kəlbəcərim, Laçınım.

Cəbrayılım, Zəngilanım, Xaçınım,

Viran olan Qarabağımdır mənim.

El dərdi qəddimi yay eləyibdir,

Gözümün yaşını çay eləyibdir.

Ömrümü-günümü zay eləyibdir,

Yediyim, içdiyim ağımdır mənim.

Binnətin dərdini yoxdur dinləyən,

Çoxdur sızıldayan, çoxdur inləyən.

Əsarət-atəşkəs vaxtı inləyən

Torpağım – aranım, dağımdır mənim.



04.01.1995
Dönəm mən
Həsrətəm, düşmüşəm sorağına mən,

Üz sürtəm Təbrizin torpağına mən.

Bu taydan o taya ata küləklər,

Dönəm bir söyüdün yarpağına mən!

Yoxdur rahatlığım, dincələm, yatam,

Hicran sona yetə, vüsala çatam!

Düşmənin qanını torpağa qatam,

Dönəm Səttarxanın yarağına mən.

Yurdum parça-parça bölünüb-heçəm,

Hazıram yurdumçun canımdan keçəm.

Düşməni saralmış,zəmitək biçəm,

Dönəm bir biçinçi orağına mən.

Gəzəm dərdli axan Araz boyunca,

Üzəm sularını mən quca-quca.

Hər iki sahili öpəm doyunca,

Dönəm xan Arazın dodağına mən.

Gücümü yağıya-yada görkəzəm,

Dosta nicat verəm, düşməni əzəm.

Dodaqlarda dinəm, əllərdə gəzəm.

Dönəm Şəhriyarın varağına mən.

Qanmayanı qandığıtək qandıram,

Hirsimi, kinimi alovlandıram.

Bizdən torpaq umanları yandıram,

Dönəm krimatoriya ocağına mən.

Məni qorxutmayır azğın düşmən də,

Öc almaq istəyən əsgərəm mən də.

Yolunda vuruşam, Vətən, öləndə

Dönəm bircə ovuc torpağına mən.

Sən mənə kömək ol, kömək ol, Allah!

Nə vəzir olmaqdır diləyim, nə şah.

Bir əlimdə qələm, birində silah,

Dönəm Ana yurdun dayağına mən.

Yurduma hər yandan tuşlanıb silah,

Yağıdan öc alam ölməzdən qabaq.

Qurtar zəlalətdən xalqımı, Allah.

Yalvarıram düşüb ayağına mən

Ölmək istəmirəm qisas almamış,

Bizə ölmək olmaz zəfər çalmamış.

Heç zaman xoş arzu gözdə qalmamış,

Dönəm bir muştuluq sorağına mən.

Binnətəm, on ildir, batmışam yasa,

Gülmərəm, Qarabağ azad olmasa.

Vətən xilaskartək bağrına basa,

Dönəm qalibiyyət bayrağına mən.



11.02.1998
Şuşayam
Ölməyib görəydim seyrini hər yaz,

Səndə vardır başqa lətafət, Şuşa!

S.Vurğun
Gözümdən yaş yağır, üzümdən məlal,

Fələyin dağılmış tufanasıyam.

Yoxdur o əvvəlki təmtəraq cəlal,

Bir yurdun talanmış viranəsiyəm.

Nə şənlik səsi var, nə də tar, qaval,

Yağı yağmalayıb elədi işğal

On ildir başımda qopub qalmaqal,

Yurdun matəmiyəm, elin yasıyam.

Nə Xan var, nə Bülbül, nə də Üzeyir,

Vurğun qucağımda yazmayır şeir.

Torpağım sızlayır, daşım inləyir,

Ayrılıq, intizar qəmnaməsiyəm.

Vəfasız qonaqlar gəlmir üstümə,

Baxmırlar başımdan qalxan tüstümə.

Yağılar dağıdır, durub qəsdimə,

Elin ləl cəvahir xəzinəsiyəm.

Yağılara satdı satqınlar məni,

Ağlayıb tərk etdi qaçqınlar məni.

Döyür dolu məni, döyür qar məni,

Qarabağın itmiş dəfinəsiyəm.

Binnətin qəlbitək çilik-çiliyəm,

Yurdun bağlı qolu, kəsik əliyəm.

Qədirin, Arifin dərdli diliyəm,

Azadlıq-hürriyyət təşinəsiyəm.



17.09.1998

Bizimdir


Gəl qələm götürək qoşa saz tutaq,
Süsənlər,sünbüllər,güllər bizimdir.


S.Vurğun

Şəhidlər üstündə hər gün yas tutan,

Yaslı qərənfillər, güllər bizimdir.

Olaq məmləkətin qəminə ortaq,

Ağrılı-acılı günlər bizimdir.

Gözəl Şuşamıızda solur gözəllik,

Orda ağı deyir bülbüllə kəklik.

Saralıb solubdur güllük, çiçəklik,

Sonası yas tutan göllər bizimdir.

Eli sevən olub eldən didərgin,

Iş gəzir, əl açır tinlərdə hər gün.

Mübtəla oluruq min dərdə hər gün,

Pərişan, pəjmürdə tellər bizimdir.

Ölmək yaşamaqdan olubdu asan,

Dərd çəkir minlərlə didərgin insan.

Ehtiyac üzündən özünü asan

Qaçqınlar, əlillər, şillər bizimdir.

Elin qara gəlib baharı, yazı,

Sızlayır Qədirin dərdli avazı.

İnləyir, hönkürür aşığın sazı,

Acı ağı deyən dillər bizimdir.

Ərşə bulud kimi qalxır ahımız,

Gah bambılı, gah səy oldu şahımız.

Yağılara qalıb Qarabağımız,

Xarabazar olan ellər bizimdir.

Harın quduzlara yal çalanlarıq,

Hər gün təhqir olan alçalanlarıq.

Gopçu natiqlərə əl çalanlarıq,

Dilənən, əl çalan əllər bizimdir.

Sürünü, naxırı, ilxını talan

Eləyib, məlumat verdilər yalan.

Binəsiz, arxasız, çobansız qalan,

Yaylaqlar, çəmənlər, çöllər bizimdir.

Çoxdur pis işindən hələ xoşlanan.


Eldən gedir yada hər bağışlanan.
Qan ağlayan, gözümüzdən başlanan
Arazlaşan sular, sellər bizimdir.

Binnətəm, gözümdən car olur sellər,

Bağlandı ağızlar, kəsildi dillər.

Düz görən gözlərə çəkildi millər,

Gözlər bizimkidir, millər bizimdir.

18.05.1992

Tovuz
Zəvvaram,Kəbəmsən, dönüm başına,

Baş əyim, üz sürtüm hər qarışına.

Qurban olum torpağına, daşına,

Nəslimin, kökümün anası Tovuz!

Qonşundur Şəmkirlə, Gədəbəy, Qazax,

Şəninə dastanlar, mahnılar yazaq.

Olasan bəd gözdən-nəzərdən uzaq

Cahanın sonalar sonası Tovuz.

Yuyanda üzünü səhərin şehi,

Səni seyr edənin coşur fərəhi.

Darayır telini Ağdağın mehi,

Düşəndə başının cunası, Tovuz.

Üzünü görənlər yolundan qalır,

Füsünkar hüsnünə baxıb zövq alır.

Sənə aşiq olur, meylini salır,

Kimin varsa əhdə vəfası,Tovuz

Cırdaxan, Mülkülü məskənim- yerim,

Alı Dədə müqəddəs - ocağım-pirim.

Gəzə dodağında, barı, bir şerim,

Ola qulağının tanası, Tovuz.

Tarixə şöhrətdir şərəfin şanın,

Zəfər kitabıdır hünər dastanın.

Sənsən şan – şöhrətli Azərbaycanın

Basılmaz səngəri, qalası, Tovuz.

Cəfər, Tanrıverdi, Telli Əsəd, Nağı.

Dostuna dost olub, yağına yağı.

Leylilər, Məftunlar yurdu, oymağı,

Eşqin. məhəbbətin dünyası Tovuz.

Ay abad yaylağım,qışlağım,binəm,

Hanı cavanlığım?Boz atı minəm,

Ceyran çölü gəzəm,ençidən enəm?

Başımda eşqinin sevdası, Tovuz.

Qoynunda yurd salmış Oğuz, Koroğlu

Hüseyn, Nəcəf kimi sənətkar oğlun.

Göylərə körpüdür Xatıncan yolu,

Məlhəmdir Əsriyin havası, Tovuz.

Dağın başı qarlı, dərən dərindir,

Torpağın ruzulu, suyun sərindir.

Havan, otun, suyun, çiçəklərindir

Dərdlərin dərmanı-dəvası, Tovuz.

Çəmənim ,gülzarım, bağçam, bağımsan,

Ümidim, pənahım, səcdəgahımsan,

Məkkəm, Mədinəmsən, qibləgahımsan

Könlümün ibadətxanası Tovuz.

Torpağın taxtımdır,tozun tacımdır,

Oğlun qardaşımdır,qızın bacımdır.

Ağ dağ Mina dağım, kəndim Həccimdir,

Ruhumun Kəbəsi,Minası,Tovuz.

Bir yanım yaylaqdır, bir yanım aran,

Səndə Abuhəyat tapar axtaran.

Neçə ki canı var, yolunda hər an

Binnət yanasıdır, yanası,Tovuz.



24.09.1987

Sənin xətrinə
İnan, hara getsən, a xətri əziz,

Dalınca gələrəm sənin xətrinə.

Mən Fərhad olaram, sən Şirin olsan,

Dağları dələrəm, sənin xətrinə.

Doğmadan doğmasan, əzizdən əziz,

Bir an da sevinməz sevən sevənsiz.

«Qal» desən, qalmaram dünyada sənsiz,

«Öl»desən, ölərəm sənin xətrinə.

Binnətəm, eşqinlə coşub-çağlaram,

Qəmlənsən, yas tutub qara bağlaram.

Kövrəlsən, mən səndən qabaq ağlaram,

Qımışsan, gülərəm sənin xətrinə.



01.09.1977

Xilaskar olsa
Fani dünya adlı bu qəmxanada,

Deyərdim dərdimi bir qəmxaz olsa,

Bir loğman gəzirəm yetişə dada,

Xəstə şəfa tapar şəfakar olsa.

Sinəmdə ləl-gövhər xəzinəsi var,

Açaram olsa bir sərraf, xiridar.

Bəzzaz atlaz olar, zərgər zər olar,

Açıq bazar olsa, sövdəkar olsa.

Qəlbimi o qədər çəkilib dağlar,

Ah çəksəm, kül olar qayalar, dağlar.

Yerlər nalə çəkər, göylər qan ağlar,

Pərişan halımdan xəbərdar olsa.

Şəhid, əlil olmuş min-min mərdim var,

dada yetənim, nə həmdərdim var.

Zəngəzur, Qarabağ,Göyçə dərdim var,

Aləm suya dönər, yaşım car olsa.

Arsızlar kef çəkir restoranlarda,

Daldey kafelərdə, xəlvət barlarda.

Binnətəm, məmləkət qalıbdır darda,

Vətən yasdan çıxar xilaskar olsa.



06.06.1990

Xoş gəlibsiniz
Möhtərəm qonşular, qohumlar, dostlar,

Bu şadlıq evinə xoş gəlibsiniz!

Bu toy sevincinə şərik olmağa,

Sevinə-sevinə xoş gəlibsiniz!

Hamınız çatasız arzuya, kama,

Toy-toya qarışa, bayram-bayrama!

Siz bu ziyafətə, bu ehtişama,

Bu toya-düyünə xoş gəlibsiniz!

Dinləyin sözünü danəndələrin,

Süzün havasına sazəndələrin

Bu bülbültək ötən xanəndələrin

Səsinə-ününə xoş gəlibsiniz!

Şənlənək,düşmənin kefini pozaq,

Qüssəni mat edək,qəmi uduzaq.


Bu kədərdən uzaq, möhnətdən uzaq

Şadlıq aləminə xoş gəlibsiniz!

Binnətəm, güvənə qızlar baxtına,

Oğlanlar şah ola bəylik taxtına.

Bəy ilə gəlinin bu şən vaxtına,

Bu əziz gününə xoş gəlibsiniz!



23.12.2001
Üşüyürəm, gəl
Həsrətin canıma od salıb, gülüm,

Ocaqda köz kimi yaşayıram, gəl.

Hicranın qəddimi kaman eləyib,

Sənsiz qəm yükünü daşıyıram, gəl.

Ayrılıq ruhumu salıb kəməndə,

Açmayır könlümü gül də, çəmən də.

Sığışa bilmirəm şəhərə-kəndə,

Yollar məni yorub, tövşüyürəm, gəl!

Binnətəm, gen dünya başıma dardır,

Qəm sinəm üstündə qatar-qatardır.

Sənsiz döşəyim buz, yorğanım qardır,

Yayda üç yorğanda üşüyürəm, gəl.



15.08.1980
Eləyibdir
Fələk bəzən qulu şahənşah edib,

Bəzən şahənşahı qul eləyibdir.

Dilqəmi dərdlərə düçar eləyib,

Kərəmi yandırıb kül eləyibdir.

Çox zalım şahların tacını alıb,

Taxtı tarac olub, yurdu boş qalıb.

Qeysi Məcnun edib, çöllərə salıb,

Leylinin yaşını sel eləyibdir.

Baxmır amanlara, baxmır ahlara,

Bəzən fürsət verir quduz şahlara.

Min-min günahsızı çəkdirib dara,

Zülmü məzlumlara bol eləyibdir.

Yağılara qalıb Ağdam, Ağdərə,

Başıma dar olub Yer- Göy, dağ-dərə,

Imkan, fürsət verib kəmfürsətlərə,

Əlif qamətimi dal eleyibdir.

Onda insaf, mürvət, ədalət hanı?

Dağıtdırdı Xocalını, Şuşanı.

Binnətəm, əzabın, zülmün karvanı

Dağlanmış sinəmi yol eləyibdir.



15.12.1990

Ceyran çölü
Gəldim, gəzdim, gördüm, könlüm açıldı,

Uşaqlıq oylağım, a Ceyran çölü.

Hər yandan üstümə ətir saçıldı,

Aldım çiçəklərdən pay, Ceyran çölü.

Açıb qucağında çiçəklər rəng-rəng,

Füsunkar seyrindən doymayır ürək.

Qınoğlu Söyünün çaldığı tütək,

Salır qucağına hay, Ceyran çölü.

Üstündə buludlar qaralır, dolur,

Çəmənin saralır, çiçəyin solur.

Ceyranla düzlərin pərişan olur,

Qonağın az olur yay, Ceyran çölü

Göydən gün üstünə alov ələyir,

Bürkü tüğyan edir,cövlan eləyir.


İyulda qoynunda ilan mələyir,

Laləzar olursan may,Ceyran çölü.

Binnət uzaq düşməz sənintək dostdan,

Bir gün yazacaqdır şəninə dastan...

Sirab olacaqsan, düşmə həvəsdən,

Milə olacaqsan tay, Ceyran çölü.


07.05.1963
Eşqimin
Yarın dərgahına yolu düşmədi,

Mənim bu nabələd, naşı eşqimin.

Gündə bir əsrarlı sevdaya düşdü,

Daşdan-daşa dəydi başı eşqimin.

Şahlığa çatmadı, taxtsız da getdi,

Nakam yaranmışdı, baxtsız da getdi.

Vədəsiz gəlmişdi, vaxtsız da getdi,

Tez gəldi şaxtalı qışı eşqimin.

İlk eşqin sevdası çıxmaz başımdan,

Yüz yara alsam da tənə daşımdan.


Uşaqkən vuruldum,mənim yaşımdan
Səkkiz yaş kiçikdir yaşı eşqimin.

Sevdim, məhəbbətlə çatdım bu yaşa,

Sevgiylə də vuram ömrümü başa.

Məhəbbətin oxu dəyməyə daşa,

Yaxşı ömrü ola yaxşı eşqimin.

Nə görüşə getdi, nə də görüşdü,

Binnətəm, həyatım ah-vayla keçdi.

Ara vuranların başına düşdü,

Dağdan ağır oldu daşı eşqimin.

14.06.1971

Düşsün
Izin ver, vəsf edim gül əndamını,

Adın nəğmə kimi dillərə düşsün.

Mədhin, vəsfin heyran etsin hamını,

Aləmə car olsun, ellərə düşsün.

Rəhm elə, son qoyaq bu fərağa gəl,

Şadlanaq, oxuyub-oynamağa gəl.

A qoynu müşk-əmbər, bizim bağa gəl,

Ətrin çiçəklərə, güllərə düşsün.

Qəlbində eşq olsa, dil açar daş da,

Dinər məhəbbətlə tökülən yaş da.

Hər yaşda sevərlər, Binnət bu yaşda

Az qalır eşqindən çöllərə düşsün.



16.06.1977
Köləyəm elimdə


(Bir qaçqının dilindən)
Özüm nabələdəm, yolum yoxuşdur,

Hara gedim qəm şələsi belimdə?

Qərib bir qonağam bu qəmxanada,

Qəm-qüssənin piyaləsi əlimdə.

Kövrəlmişəm, boğur məni qəm-qəhər,

Gözüm üfüqdədir, açılmır səhər.

Yediyim ağıdır, içdiyim zəhər,

Boğuluram gözdən axan selimdə.

Sarı, qara marlar məni çalıbdır,

Elim, obam yağılara qalıbdır.

Yersizlər yerimi zorla alıbdır,

Haqsız, muzdsuz bir köləyəm elimdə.

Dərd çəkməkdən oldum dəli, dərdəcər,

Zöhhak zülm edib belə, nə Səncər.

Evim çadır, koma, özüm dərbədər,

Ölüb qurtarmıram, yoxdur ölüm də.

Didərgin deyiblər, Binnət, adıma.

BMT-nin düşməyirəm yadına

Atılmışam qaçqınlığın oduna,

Alışmışam, qovruluram külündə.



09.03.1992
Sənsiz könlümün
Sənsiz bir qəribəm öz elimdə mən,

A dostu, həmdəmi, yarı könlümün.

Sənsiz ərşə çıxır ahım-amanım,

İnləyir kamanı, tarı könlümün.

Bülbül yaşayarmı gülündən ayrı?

Günüm bir gün deyil, yar, səndən ayrı.

Yaz gəldi, əriyir dağların qarı,

Sənsiz əriməyir qarı könlümün.

Sənsiz əzablarım həddini aşır,

Ağlar gözlərimin yuxusu qaçır.


Sənsiz bağ-bağçada gül-çiçək açır,

Gül açmayır çəmənzarı könlümün.


Sənsiz üz-gözümdən kədər tökülür,

Üstünə qəm-qüssə,qəhər tökülür.


Dost-dostla,yar-yarla oynayır,gülür,

Üzü gülmür səndən ayrı könlümün.

Danış-gül naz ilə, mərhəmət ilə,

Ömrü başa vuraq məhəbbət ilə.

Nolar, insaf elə, mərhəmət elə,

Bir yol üzü gülsün barı könlümün.

Sənsiz çəkdim dərdi, qəmi, məlalı,

Bircə yol halımdan olmadın halı.

Rəhm elə Binnətə! Sənsiz qalalı

Möhnətdir yoldaşı-yarı könlümün.


19.10.1984

Hələ
Öyün, a bəxtəvər, güləndam xanım,

Ömrünün sultanlıq çağıdır hələ.

Məndən gen gəzirsən, üzülür canım,

Naz-qəmzən aləmi dağıdır hələ.

Buxağın bəyazdır ilk yağan qardan,

Dodağın meyxoşdur yetişmiş nardan.

Yanağın gözəldir güldən, gülzardan,

Qucağın behiştin bağıdır hələ.

Eşqindən olmuşam ağıldan səmə,

Sən salıbsan məni bu dərdə, qəmə.

Ahı daşı dələn dərdli sinəmə

Çəkdiyin ayrılıq dağıdır hələ.

Fələyi kar edib qəlbimin ahı,

Ah-vayla açıram sənsiz sabahı.

Binnətin üzünə, a şahlar şahı!

Könlünün qapısı bağlıdır hələ.


28.06.1987


Pişvazına çıxım gəl
Gülüm, qoyma həsrətindən üzülüm,

Gül-çiçəklə pişvazına çıxım, gəl.

Güləndamlım, gülcamallım, gülüzlüm,

O füsunkar camalına baxım, gəl.

Sənsiz keçən saatları sanadım,

Sənsiz sanki sınıb qolum, qanadım.

Gah özümü, gah da səni qınadım,

Ərşə çıxdı naləm, ünüm, ahım, gəl.

Demirsənmi hicrin məni məhv edər,

Harda qaldın? Üzdü məni qəm, qəhər.

Üz-gözümü bürüyübdür dərd, kədər,

Gəlişinlə dərddən, qəmdən çıxım, gəl.

A söhbəti şirin, sözü məzəli,

Tovuz tamaşalı, Tovuz gözəli.

Hardasan? Olmuşam divanə, dəli,

Ayrılığın küməsini yıxım, gəl.

Ay ömrümün bər-bəzəyi, zinəti,

Bu yaşında Məcnun etmə Binnəti.

Qoy bu acı ayrılığı, həsrəti

Vüsalınla yandırım gəl, yaxım, gəl.



24.01.1977
Qəçrəşdə
Gəlin bir də gələk Qəçrəşə, dostlar,

Gəncliyin alovu, odu sönməmiş.

Bir də bu yerlərə qayıdaq, nolar,

Bizdən təbiətin üzü dönməmiş.

Yamacda dincələk, düzdə oturaq,

Hər bulaq başında bir məclis quraq.

Ana təbiətin qoynunda olaq,

Çiçəklər saralıb, güllər solmamış.

Ətirli gülləri öpək, qoxuyaq,

Çobanyastığından çələng toxuyaq.

Quşlarla səs –səsə verək, oxuyaq,

Mahnısız, çalğısız qəlb isinməmiş.

Taladan-talaya bir cığır salaq,

Səfalı yerlərə baxaq, zövq alaq.

Qartallı dağların seyrinə dalaq,

Üstünü çən - çiçək, duman almamış.

Binnətəm, düşməyək ilhamdan uzaq,

Hərəmiz bu yerə bir şeir yazaq.

Çıxaq dağ başına, olsa da sazaq

Günəş əyilməmiş, qaş qaralmamış.



28.05.1988

Gəzirəm
Təşnəyəm, buz kimi dişi göynədən,

Dodağı donduran bulaq gəzirəm.

Başıma od yağır, yoxdu rəhm edən,

Aranda yanıram, yaylaq gəzirəm.

Yenə Qarabağa mənsiz gəldi yaz,

Köçüm yolda qaldı, köç yolda qalmaz.

Belə zülm olmaz, belə dərd olmaz,

Dilimdə ah-aman, Allah gəzirəm.

Ağlar gözlərimdən yuxum qaçıbdır,

Yurdum dağılıbdır, yuvam uçubdur.

Ocağım sönübdür, çıram keçibdir,

Bir kümə, bir isti ocaq gəzirəm.

Başımdan aşıbdı dərdim, məlalım,

Sinəmə çal-çarpaz dağ çəkir zalım.

Halımı deməyə qalmayıb halım,

Bir həmdərd-dərdimə ortaq gəzirəm.

Gedib Kəlbəcərim, Şuşam, Ağdamım,

Küsüb gözəllikdən, güldən ilhamım.

Külək çox bərk əsir, titrəyir şamım,

Tufana davamlı çıraq gəzirəm.

Həsrətəm dumanda,çəndə azmağa,
Yatammıram,yuxum yoxdur yozmağa.
Dərd məni yandırıb-yaxıb,yazmağa
Qələm axtarıram,vərəq gəzirəm.
Qəmlə doldurmuşam qəm gəmisini,
Həm qəmi çəkirəm, həm gəmisini.

Dünyanın dərd, kədər, qəm zəmisini

Biçməyə bir iti oraq gəzirəm.

Binnətəm, çalışdım yetəm murada,

Heyif ki, zəhmətim itdi arada.

İnsafsız, mürvətsiz, zalım dünyada

Azadlıq,müsavat və haqq gəzirəm.
27.08.1992

1   ...   7   8   9   10   11   12   13   14   ...   20


Verilənlər bazası müəlliflik hüququ ilə müdafiə olunur ©azrefs.org 2016
rəhbərliyinə müraciət

    Ana səhifə